e vão 84!

In iste die, Dr. Piet Cleij, le cognoscite lexicographo ha 84 annos. Su grande cognoscimento de linguas, insimul con su vitalitate incredibile, face de iste infatigabile cercator de nove parolas international le plus grande dictionarista de interlingua de omne tempores.
(lege su biographia)

Nos le desira, in iste data special, un felice anniversario. Hurrah!

rip

Péter Kovács reportava un triste nova in Facebook: le morte de su conational Ferenc Jeszenszky, «prime e eminente representante de interlingua in Hungaria» e  «scriptor del manual hungarophone de interlingua». Ancora secundo le redactor de Radio Interlingua, Prof. Jeszenszky decedeva le 21 de april 2011 e su interramento essera le 11 de maio a 15 horas in le cemeterio de Törökbálint. (Vide su biographia)

Como scribe Prof. Stanley Mulaik in su reaction al morte de iste experto in linguas e linguista, anque nos «es multo triste de apprender del morte» de un del pauc personas que dominava de un maniera magistral le stilistica de interlingua. Ferenc Jeszenszky esseva un de mi antecessores como secretario general del UMI inter 1989 e 1991 e anque, insimul con Dr. Piet Cleij, membro del Commission Linguistic, habente essite ancora redactor interimari del magazin Currero, i.a. Es un pena que un persona si importante pro le movimento nos lassava prematurmente al etate de 78 annos...

Regrettabilemente mi planos pro visitar le e cognoscer le personalmente – le proxime anno – non va plus esser un realitate... Totevia, io desira que su anima reposa in pace e presenta hic mi condolentias a su familia (del qual face parte, in le fundo, omne interlinguistas).

lexicographus maximus

Iste mense es fertile in anniversarios de personas qui labora al inricchimento de interlingua. Post le commemoration del anniversario de Dr. Ingvar Stenström (qualque dies retro), hodie es le die del 83^tie anniversario del plus grande lexicographo de interlingua: Piet Cleij. Iste «titan», vigorose e infatigabile, es un dictionarista unic in le historia del lexicographia de interlingua e su proficiente contributiones se ha revelate obras de referentia obligatori pro omnes qui vole esser actualisate in le campo lexical del lingua.

Ben que le IED ja contineva satis de vocabulario pro le communication quotidian, con le obras de Piet Cleij (Listas supplementari, dictionario interlingua-nederlandese e nederlandese-interlingua, dictionario francese-interlingua, etc.) le corpus lexical de interlingua attinge su maxime grandor in fornir a interlingua (e a su utilisatores) un vocabulario que permitte transcender le uso currente del lingua e arrivar a un dominio plus specific e al mesmo tempore variate de conceptos e expressiones que alteremente esserea solmente attingibile a un parve numero de personas. Iste labor colossal, facite con erudition e maestria, va remaner un indelibile marca in le tempore e in le templo de interlingua e es, al mesme tempore, un solide e inspiratori exemplo pro le veniente generationes.

Gratias, Dr. Piet, pro vostre enorme contribution, i.a., al ampliation del vocabulario de interlingua, e nos spera poter contar con vostre compania ancora durante multe annos. Congratulationes!

[Lege su biographia per cliccar hic]

interlinguarejar

Hodie es le die del 82^nde anniversario de prof. Ingvar Stenström, un del plus active personas durante le ultime cinquanta annos al diffusion de interlingua.

Io cognosceva iste extraordinari homine, affabile e communicative, durante le conferentia international tenite in Germania le passate anno. Quando nos nos incontrava le prime vice ille esseva gaudiose de trovar portugeses in un conferentia per le prime vice. Nos non multo ha parlate ma io memora que durante un del intervallos ille diceva: «Vos lusophonos parla interlingua bellemente... e nos spera que vos essera le personas qui va integrar le historia como 'illes qui va facer le introduction de interlingua in le scholas de Portugal'. Vostre lingua certo es belle, ma... interlingua es plus facile...».

Iste apostolo del «belle lingua» («un 'grande cannon' in le mundo de interlingua», como dice Erik Enfors) non perde su grande enthusiasmo pro le promotion de interlingua, «malgrado» su avantiate etate e su problemas ophthalmologic.

Congratulationes, magistro Ingvar, e face un effortio pro star con nos in le proxime conferentia international!...

[Vide hic le articulo super Ingvar Stenström que Erik Enfors scribeva in Wikipedia]