le symbolismo del numero/s

Grande pensatores como le sage Pythagoras e le philosopho Platon, e plus tarde Galileo (e alteres), habeva in lor inseniamentos le pedagogia super le importantia del entitates numeric in le conception del mundo e del existentia human.

Il es curiose que nos, contrarimente a illo que occurreva con le litteras, hereditava le cifras ab le arabes via un legato hindu... Nonobstante le manco de un signification plus profunde (esoteric) in le inseniamento del tempores moderne, nos, les occidentales, hereditava le valor numeric e quantificabile del cifras como expression commun a ambe civilisationes.

Nos non va hic exponer le inseniamentos del numerologia occidental e su theoria del reduction theosophic, ma plutosto approchar un numero ligate al symbolismo del linguas e anque del tarot: le numero dece-sex.
[Ante toto, le tarot consiste de 22 laminas (arcanos major)/litteras (del alphabeto hebraic) e representa le via del initiation al mysterios del sacerdotes egyptie (e plus tarde del artifices del medievo).]

Qual inseniamento potera nos haurir ab le turre que menava al proliferation del linguas actual? Iste carta es plen de symbolismo, ma le arcano potera symbolisar le novicio incaute que vole ben, como Icaro, passar le limites de su comprension... o ben le apprentisse que essaya meliorar su cognoscimentos trans su experientias personal (a vices penose e probative).

le sal e le baptismo

In le liturgia catholic le die 24/6 es consecrate a Sancte Johannes Baptista.

Heri il habeva festa in mi village e hodie, ben que illo non es officialmente un die feriate, quasi nemo labora.

Un del symbolos del ceremonia baptismal es, como omnes sape, le aqua, ille elemento que vivifica le natura e es le 'fonte' del vita (de hic le acception 2 de 'fontal' in le IED: baptismal), ma in le sacramento de baptismo il ha altere elementos importante e minus cognoscite, como le sal.

Ecce infra un parve texto (que ja esseva publicate in 'Panorama') super ille elemento si importante in le equilibrio osmotic e in nostre proprie equilibrio physic e mental.

Le uso de sal in ceremonias baptismal veni ab le prime tempores del Ecclesia (sec. III/IV). Su character sacre e religiose es debite a su incorruptibilitate e es un del symbolos del vita que le christianos debe viver. Pro le apostolo Mattheo illo symbolisava le sapientia, tamen primitivemente illo poterea esser empleate in ceremonias de exorcisation. Non tote le ritos christian lo usa in le baptismo de lor fideles e catechumenos; illo es solmente usate in le rito roman.