supplemento al IED

Un tresor de parolas

Interlingua continua developpar se como lingua, e su vocabulario cresce con le linguas fonte que es le base del vocabulario international. Pro isto le "Interlingua-English Dictionary" (IED) – le prime obra publicate in interlingua in 1951 – contantemente besonia un supplemento plus extensive pro colliger e registrar omne le extra parolas.

Le supplemento actual (de 290 paginas) – publicate in occasion del Die de Interlingua le 15 de januario – presenta plus que 18.000 "nove" parolas de interlingua con lor traduction in anglese. Omne le entratas seque le methodologia linguistic detra interlingua, assecurante lor internationalitate e assi lor comprehensibilitate global. Iste supplemento, que contine anque un lista de errores typographic in le IED, assi es un importante obra referential que essera diligentemente consultate per omne usatores professional de interlingua in le cerca de exprimer exactemente le nuance correcte.

ancora

quando le vento suffla tempestas e le mar grosse disborda, quando le viage pare non haber retorno, memora que le amicitate es le solide ligamine que duce le fragile barca al deriva verso le porto de refugio

morphologia de un cavallo

 

rossiniolo

le rossiniolo pipa
sin cessar
e le nocte longe
deveni un breve hymno
pro illes qui pote
sin haber somno
su canto ascoltar

linguas e linguistica

Isto es le secunde libro del serie "lexika", que comenciava le serie "multilingue" con entratas in interlingua. Multe personas, directe- o indirectemente, esseva de adjuta in elaborar lo. Gratias a omnes.

Le publicitate, un pauco pedantesc, es ver e verificabile e es, al mesme tempore, un defia pro le melioramento e augmentation de iste breve glossario que securmente contine errores e omissiones. Le studio del philologia ha plure stratos e non sempre es satisfactori le resultato de accordar le clivage que existe inter illos.

 Ecce su prefacio:

The first multilingual glossaries on linguistic terminology were published some decades ago, and since then not only many new terms and definitions but also the respelling of some expressions have entered and increased the vocabulary of linguistics found in the linguistic literature at that time. For instance, in Multilingual Lexicon of Linguistics and Philology published by Rose Nash in 1968, the French corresponding term to the English “allophone” was variante de phonème, réalisation de phonème, having a correct definition but nonetheless missing the usual denomination of such term - which is the same as in English, that is, “allophone” -, employed everywhere nowadays (See Le dictionnaire de linguistique..., p. 25, for instance).

If works like Rose Nash’s were extremely rare at the time of its publication, the scenario has not changed substantially over time, in spite of the increasing expansion of the subject matter and the great specialization of the scientific study of language. The Multilingual Glossary of Linguistics now published is intended to be useful rather than exhaustive; on the other hand it is an up-to-date tool that will spare students and experts in linguistics and philology the trouble of purchasing and/or check terms in several dictionaries.

The book is divided in two separate parts: The first part contains a table with over 5,900 lemmas in English with their corresponding columns in German, French, Portuguese, and Interlingua, and in the second part one can find a list of 170 language names in English, German, French, and Interlingua, including their corresponding ISO codes. Finally, on pp. 201-202 there is a bibliography of the main references checked for the compilation of this work.

le symbolismo del numero/s

Grande pensatores como le sage Pythagoras e le philosopho Platon, e plus tarde Galileo (e alteres), habeva in lor inseniamentos le pedagogia super le importantia del entitates numeric in le conception del mundo e del existentia human.

Il es curiose que nos, contrarimente a illo que occurreva con le litteras, hereditava le cifras ab le arabes via un legato hindu... Nonobstante le manco de un signification plus profunde (esoteric) in le inseniamento del tempores moderne, nos, les occidentales, hereditava le valor numeric e quantificabile del cifras como expression commun a ambe civilisationes.

Nos non va hic exponer le inseniamentos del numerologia occidental e su theoria del reduction theosophic, ma plutosto approchar un numero ligate al symbolismo del linguas e anque del tarot: le numero dece-sex.
[Ante toto, le tarot consiste de 22 laminas (arcanos major)/litteras (del alphabeto hebraic) e representa le via del initiation al mysterios del sacerdotes egyptie (e plus tarde del artifices del medievo).]

Qual inseniamento potera nos haurir ab le turre que menava al proliferation del linguas actual? Iste carta es plen de symbolismo, ma le arcano potera symbolisar le novicio incaute que vole ben, como Icaro, passar le limites de su comprension... o ben le apprentisse que essaya meliorar su cognoscimentos trans su experientias personal (a vices penose e probative).

kaleidoscopio

canceres

est, west

i al nord

prender le fresco

del cornucopia

prime, secunde

quatro temporas

del alchimia apostolic

capricorno expiatori

de viages e sonios

vados communicantes

sud azur

infusiones de confucio

in veres prosternate

sol

do

rhythmo thymic

status e statuas

de longe reguarda

ungulas de leon

estates transcendentes sol

do mi mina rete

de crystallo rampante

nerd volante

dedalo paisante

drama repercussion

reluctivitate re remar

al nadir ir

scrutar pyramides

arcan in hypogeos

cranios trepanante

le urbe trepidante

de arietes e lacais

bello holistic

nodos attaccate

al gordian collo laic

cicuta e citheras

que se plange

del tempore perdite

sasi le movimento

astros e stars granos

mais magia la res.

hic et nunc

del tempo re

notas e bancos

con passo

verso le nord

sin perder le bussola

lux fiat al pico

weltanschauung equinoctial

equilibrio lib(e)ral

nodos, internodios e modos

grecos e troian

castello stilo

silentiose abysso

veste caste

le vestal immolate

relativitate formal

 Le forma etymologic, defendite religiosemente per alcunes, ha un importantia relative in le formation del prototypos.

Isto es facilemente demonstrabile, i.a., per le parola anglese Arawak, al qual corresponde le francese arawak e le italiano Arawak (Arawack, Arowak).

E ben, in le lingua arawak le parola ab le qual tote le supra-mentionate vocabulos proveni es aruac, conforme al descendentes italian Aruac (arüaco), portugese aruaque e ancora german Aruak. Si on sequeva le currente etymologista le prototypo deberea esser qualcosa como "aruac", nonne?

Vermente? Quando in germano on dice anque Arawakisch e, super toto, le codice ISO 639-2 (arw), que determina le nomine per le qual le linguas es cognoscite mundialmente, denomina le lingua del arawakes arawak?

Del altere latere, le prototypo non sempre retene tote le tractos que existe in plus que duo unitates, como occurre per exemplo con le parola anglese telephone, correspondente al francese téléphone e al  portugese telefone que, sin reguardo al historia de su entrata e evolution in le varie linguas, remitte sempre pro le elementos grec 'tele-' e 'phōnē', lo que poterea inducer al error de pensar que le forma esserea "telephone", con un "e" final, quando in realitate le prototypo es "telephono", con "-o".

studio

Studiar – diceva mi professor de latino – exige effortio.
Ma "effortio" non es mensurabile solmente per le tempore que uno passa per leger o recercar un certe subjecto; le ver "effortio" (studer) es supra toto haber intelligentia del subjecto analysate.
E isto es justo le senso del etymo latin (studere), exprimite tanto per le expression anglese "put one’s mind to" como anque per su traduction international: "applicar se a".
Sin application, le effortio es solmente 'perder le tempore'.

homo epidemicus

atomos confinate
al rolo incerte e capriciose
de un eccentric orbital

in le continue currente
de un tautologic circulo vitiose
es attrappate le sapiente animal
immerse in su incertitude presente
de un mundo disincantate e brutal

zeitgeist

trance mutante de un transition sin zen e genio
luna plen de sonios chimeric e innocentia perdite
sur le roccas prometheic de un paradiso
ubi le virus corrode corpore e anima
e le petras preciose es exhaurite
natura matre e sacre receptaculo
con fertile pratos verdeante
ubi le tigre es musellate
e le amazones immolate
con cantos de sirenas delirante
que ex officio, exorbitante,
promitte le utopic miraculo

le viagiator

labor oratorio

vetuste libros mute
reposa in le atmosphera
mystic del laboratorio
sempre in action.
 

solmente le ruito del tenue foco
e le substantias in ebullition
rumpe le silentio de iste oratorio
ubi le anciano opera diligentemente
su sonio de transmutation.
 

noctatas insomne inter retortas,
pipettas, matrases e le grande alambic
que labora sin reposo le formulas hereditate
de un hermetic e longe tradition. 

paulatim, le foco purifica toto
e le pesante plumbo in le athanor,
ab un metallo vil, devenira auro solar
recoperte per un aura de purification.

effusion

sanguine effundite

sur le campo,

sin color,

de un longe battalia

magnetic e interior

 

plebeie o regal

le sanguine effundite,

rubie o blau,

illo es sempre, sempre

real

ancora

le nave esseva ancorate, preste a partir pro le viage incognite de circumnavigation interior, inter le nadir e le zenit de mundos infinite.

le viage es circumferite per discopertas e meravilias como torquite imagines del mirage de un sonio al deriva in un mar de optic disillusiones.

le nave esseva la o esserea solo un mirage de un utopic viage sin destination? le aventura es imagination ordite in escappadas solitari del sonio que sulca le subtil linea de aqua sin puncto de ancorage in le mar grosse del illusion.

apparato phonatori

le quatro pilares

litteras al novicios

omnes pote errar,
totevia le perseverantia
in le error solo revela nescietate

 

1)
Haber bon voluntate non suffice pro que un argumento speciose deveni un explication ver. (Isto solmente pote functionar per medio del "affinitates elective").

Ille qui vole facer commentos proficue primo debe haber intelligentia del lingua del passages/textos a commentar; secundo, ille debe haber un cognoscentia plausibile del subjecto tractate; e tertio, le terminologia usate debe esser precise.

2)
Novicios (e '*veteranicios'), evita le petra de scandalo...

Il ha plure factores que concurre pro que nos omnes committe errores; alcunes de illos es facilemente evitabile per usar le utensiles disponibile gratuitemente. Monstra tu elegantia e bon gusto per scriber (al minus orthographicamente) in un maniera correcte!

3)
Presta attention al parolas que tu usa in le construction de un phrase, nam a vices illo pote non significar le message que tu vole vehicular...

Per exemplo con le phrase '*per Chrome le dictionario habera que installar lo in un altere dossier', probabilemente on volerea dicer que "pro Chrome, on debera installar le dictionario in un altere dossier".

Mesmo si esseva scribite 'pro Chrome' in vice de '*per Chrome' le phrase continuarea asemantic perque le referente del pronomine 'lo' es(serea) 'Chrome' - e non es le 'dictionario' que lo installa...

4)
Le mer cognoscentia libresc non suffice pro attinger le expertise in un determinate subjecto.

Il es necesse que on lege multo, o, melio, que on studia, que on confronta le plure fontes disponibile, que on reflecte super le datos colligite e, super toto, que on labora diligentemente si on vole esser versate in iste o ille subjecto.

5)
Illes qui debatte un topico grammatical o discute un thema linguistic debe esser precise, directe e objective.

• Exactitude grammatical e terminologia rigorose rende un argumentation comprensibile a omnes qui discute; sinon, illo deveni ambigue e ergo confundente. Studia e non infirma tu discurso per medio de tu inscientia!

• Digressiones e logorrhea debe esser evitate a fin que uno non perde le filo del discurso, e non erra per le campos del excursiones enoiante. Solmente sin deviationes e verbositate un discussion pote succeder, e assi attinger le scopo desirate. Contine te e non te perde in le labyrintho del parolas!

• Objectivitate es essential al resultato de un discussion seriose, e si illo es absente le argumentation deveni imprecise, le discurso es improprie e partial, e le analyse ha manco de nitiditate. Reflecte e ha sempre in mente le corde del question!

6)
Quando tu traduce textos, tu debe prestar plus de attention al senso que al contento. Traductiones al pede del littera pote menar a phrases sin senso.

7)
Certe formas (correcte) pote "choccar", ma on nunquam debe usar un parola cuje forma es incorrecte al detrimento del objectivate. Sia objective e rational, e evita le digressiones per non exprimer tu preferentias personal.

8)
Effortiar se es laudabile e nos omnes apprende con nostre errores in le longe cammino plen de petras de scandalo, que es nostre evolution.

Totevia, ante imbarcar se in un interprisa uno debe prender in consideration un serie de factores. Le successo o insuccesso de un tal interprisa depende non solmente del disponibilitate e investimento personal de su proponitor, ma anque del maestramento del subjecto interprendite. Sin tempore e/o sin competentia le interprisa va facer fiasco.

pueril etate

pueril

commento vacue

foras del realitate

febril

inclination fatue

de un senil obtusitate

Anthologia Litterari

Iste spicilegio es un compilation de alcun contos, poemas e phrases que io publicava, inter 2010 e 2020, in revistas de interlingua e in plure sitos electronic.

Le prime parte contine dece-un contos, incluse Le Superstition, Sisypho e Mythomorphose; le secunde parte es un collection de poemas con un "Haikario"; e le tertie parte consiste de decenas de phrases a guisa de "Reflexionario".

Pro illes qui ama le belles-lettres, leger litteratura original in interlingua es sin dubita un passatempore fructuose e inspiratori.

Le Anthologia pote esser acquirite hic.