29 Aug 2016

prototypologia

Il es de uso currente que le novicios (e alcun veteranos) tende a vider toto lo que concerne le formas vocabular de interlingua como un sorta de imagine specular projicite per le formas que le parolas ha in le linguas fonte.

Como dice le IED (p. xxiv) il non ha un methodologia applicabile a omne le casos de standardisation de prototypos e, dunque, le importantia del analyse multidimensional in le extraction vocabular versus le approche superficial del formas in le plure variantes non debe ser neglecte, lo que es illustrate in le exemplo infra.
(Iste exemplo es simple e evidente; totevia, como esseva supra-mentionate, on debe haber in mente que un prototypo non sempre es extracte del mesme maniera - como es, p. ex., le formas obvie mano o philosophia).


Lat.: pistillus, i; (NL) pistillum, i

fr/an: pistil (Le voc. an. es un presto ab le forma apocopate fr. 'pistil' (<pistille, 1685)).
es/pt: pistilo

it: pistillo

A prime vista il poterea parer que le forma in interlingua era/serea 'pistilo', nam solo le forma it. ha 'll'.

(Il ha nulle regula in fr. e/o an. (e ia.), que determina que debe ser addite un 'l' al fin de un parola quando illo se termina in 'l', cf. 'filaire' e 'methylic', respectivemente).


Totevia - e hic entra in action le 'multidimensionalitate' -, le derivato an. [pistillar] e/o le fr. [pistillaire] va 'salvar' le forma original e, assi, es trovate le forma standardisate ('le prototypo') in interlingua: pistillo.

23 Aug 2016

logica


Si on funda un rationamento super un hypothese o un proposition false, le conclusion - como resultato 'logic' del puncto de partita - es sempre erronee (tamen illo pote haber un discurso logic e facer senso in le mente de su creator).