26 Dec 2012

bon anno creative!

Car amic lectores, 

Interlingua vive un grande impasse: poc personas vermente interessate in travaliar pro le divulgation effective del lingua, le dirigentes del movimento pare eximer se de lor deberes e responsabilitates basic... Totevia, le «projecto» continua valide e actual e con parve gestos de cata uno de nos on potera facer avantiar le barca un poco plus in direction al porto promittite: le communication sin barrieras. Il va sin dicer que pro eliminar barrieras in le communication, il es necesse haber un communication effective... cosa que non occurre regularmente del parte del principal responsabiles del movimento. 

Personalmente io spera que le anno veniente sia le puncto de mutation de iste status quo moribunde e mediocre al qual on arrivava debite al manco de un direction e orientation efficace del parte del organisation. Certemente que le movimento non es morte, e que il ha personas qui travalia quasi quotidianmente pro le divulgation e le developpamento de interlingua, ma le stato actual de divulgation in le mundo e, super toto, le manco de ver dirigentes capabile de catapultar le lingua al loco que illo merita in le plano international es vermente deprimente... 

Io desira a vos omnes un nove anno al mesura de vostre desiros e plen de creativitate!

Interlingua, le futur paradigma in communication international.

6 Nov 2012

creativitate

Le 62nde anniversario se approxima e io pensa que serea utile e interessante publicar un revista pro commemorar le die de interlingua, le 15 de januario del proxime anno. (Suggestiones pro le titulo son benvenite).

In iste senso, io lancea un defia al fortias vive del movimento pro collaborar in iste evenimento per inviar me [interlusitana@gmail.com] materiales oblidate in vostre tiratorios – o nove materiales –, subordinate al themas listate infra, usque al die 24 de decembre.
  • Historia
  • Illustration (Copertura de revista (A5); cartoons, altere illustrationes);
  • Linguistica e etymologia;
  • Litteratura (Biographia; conto; critica litterari e recension de libros; poesia);
  • Photographia;
  • Rumpecapites.
Le articulos debe haber, al maximo, 6 paginas A4 typate in 'Times New Roman' 12pt (formato .doc(x) o .odt), e le photographias e illustrationes debe haber un bon resolution graphic (in .jpg, .png o .tiff).

Omne le collaboratores ha le derecto a un exemplar in formato .pdf, e le autor del melior travalio recipera un copia in papiro (imprimite per lulu.com) como premio.

Non lassa que le presente crise (financiari e moral) bloca tu creativitate e imagination e participa in iste parve contribution pro divulgar, creativemente, le hereditage cultural del Humanitate que es interlingua.

8 Jun 2012

dictionario bilingue de biologia

Le grande lexicographo e studioso del vocabulario de interlingua, Piet Cleij, veni de publicar su ultime travalio, le dictionario bilingue de biologia interlingua–anglese.
Le Dictionario de Biologia es un obra basilar in le campo del scientias biologic, utile a totes qui vole approfundar lor cognoscimentos del vocabulario scientific international. Illo contine 9000 entratas e circa 7500 exemplos de application in interlingua e anglese; plure entratas ha ancora designationes ab le Terminologia Anatomica
Ultra isto, es includite varie  appendices con plure tabellas basate super obras  de referentia, lo que face de illo un utensile fidibile e de facile maneamento. 

Pro plus de information, consulta le pagina ubi illo pote ser acquirite: Dictionario de Biologia interlingua-anglese.