27 May 2010

lexicographus maximus

Iste mense es fertile in anniversarios de personas qui labora al inricchimento de interlingua. Post le commemoration del anniversario de dr. Ingvar Stenström (qualque dies retro), hodie es le die del 83tie anniversario del plus grande lexicographo de interlingua: Piet Cleij. Iste «titan», vigorose e infatigabile, es un dictionarista unic in le historia del lexicographia de interlingua e su proficiente contributiones se ha revelate obras de referentia obligatori pro omnes qui vole esser actualisate in le campo lexical del lingua.
Benque le IED jam contineva satis de vocabulario pro le communication quotidian, con le obras de dr. Piet Cleij (Listas supplementari, dictionario interlingua-nederlandese e nederlandese-interlingua, dictionario francese-interlingua, etc.) le corpus lexical de interlingua attinge su maxime grandor al fornir a interlingua (e a su utilisatores) un vocabulario que permitte transcender le uso currente del lingua e arrivar a un dominio plus specific e al mesmo tempore variate de conceptos e expressiones que alteremente serea solmente attingibile a un parve numero de personas. Iste labor colossal, facite con erudition e maestria, va remaner un indelibile marca in le tempore e in le templo de interlingua e es, al mesme tempore, un solide e inspiratori exemplo pro le veniente generationes.

Gratias, Dr. Piet, pro vostre enorme contribution, i.a., al ampliation del vocabulario de interlingua e nos spera poter contar con vostre compania ancora durante multe annos. Congratulationes!

[Lege su biographia per cliccar hic]

1 comment:

  1. erik.enfors@gmail.com27/05/2010, 13:27

    Car Piet!
    Congratulationes a tu anniversario! Io desde longe tempore ha expectate reincontrar te in Kalmar e isto es un ultime supplica que tu forsan poterea alterar tu decision e tamen va arrivar. Tu vermente es besoniate in iste eventos. E io promitte que tu iste vice non debe experientiar un viage terrificante al aeroporto in le ultime minuta :-).

    Con mi optime salutes,

    Erik Enfors

    ReplyDelete